Komên Îslamî yên tundrê îro Înê di danê berbanga sibehê de ji navçeya Daratizê û Keleha Semanê êrîşî gundên Îska, Basûfan û Başemrê yên navçeya Şêrewa ya Efrînê kirin.
Di êrîşa ku ji du mihweran ve pêk hat, çekên giran hatin bi kar anîn. Yekîneyên Parastina Gel (YPG) bersîva êrîşan da û pevçûnên dijwar rûdan.
Welatîyên gundên Îska, Basûfan û Başemrê ku hatine armanc kirin, ji Dengê Amerîka re dîyar kir ku çekdarên Cebhet El-Nusra û Ehrar El-Şam ên li Keleha Seman û navçeya Daretizê bi cih bûne, êrîşî gundên wan dikin û sîvîlan armanc dikin.
Jêderên leşgerî ji Dengê Amerîka re ragihand ku di encama şer de 3 çekdarên tundrê hatine kuştin, 10 birîndar bûn û jimareke ser çek û cebilxane hatin destxistin. Di encama şer de herwiha 2 şervanên YPG jîyana xwe ji dest dan û 7 jî birîndar bûn.
Hêjayî gotinê ye ku komên îslamî yên tundrê li gundewarên rojavayê Helebê û li bakurê parêzgeha Îdlibê bi cih bûne û êrîşî gundên navçeya Şêrewa û Cindirêsê yên li başûrê Efrînê dikin.
