Partîya Demokratîk ya Gelan (HDP) li Stenbolê meydanên ku çûnûhatina zêde li wan heye, pêşengehên wêneyên trajedîya Êzîdîyên Şengalê û Rojavayê Kurdistanê vedike.
Li dema pêşandana wêneyên karesatê, banga alîkarîyên mirovî jibo gelê Êzîdî û Kurdistana Sûrîyê tê kirin.
Di belavokên li xelkê têne belavkirin de jî daxwaz tê kirin, ji penaber û qurbanîyên van karesatan re hevkar bibin.
Rêvebirê HDP’ê yê navçeya Şîşlî Mahmut Çavli, ji Dengê Amerîka re dibêje, “Em her roj li çend cihên cuda van çalakîyan li dar dixin û jibo bibin hevkar, bala xelkê Stenbolê dikişînin ser rewşa Êzîdîyên Şengalê û Rojavayê Kurdistanê.”
Pêşengehên wêneyên karesata Şengalê û kuştinkarîyên DAÎŞ’ê yên li ser xelkê Kurdistana Sûrîyê heta roja Înîyê berdewam dikin.