Di 28'ê Tebaxa 2021ê de li bajarê Lille li Fransa hunermend û pêşkêşvanê Stêrk TV Şêrko Celal Koyê ji ber nexweşiya COVID-19 jiyana xwe ji dest da.
Hunermendê şêwekar Şêrwan Ismaîl ku ji nêzîk ve Şêrko nas dikir li ser mirina Şêrko, xemgîniya xwe ji Dengê Amerîka diyar kir û got:
" Şêrko kesayetek pirr taybet bû di nav civata kurdên diyaspora de, him wek hunermendekî şêwekar xwedî ezmûn, him jî wek rojnameger û pêşkêşvanê TV û ya din jî wekû kurdperwerekî rola xwe di nav hemû calakiyan de dilîst. "
Şêrko Celal kî ye?
Şêrko Celal Mameş Koyê, di sala 1956'an de li bajarê Koyê ji dayik bûye. Dibistana seretayî li Koyê dixwîne û piştre li bajarê Hewlêrê bi cih dibe. Ji bo xwendina hunera ciwan berê xwe dide Bexdayê û li wir xwendina hunerê dike.
Di sala 1974'an ew li gel birayê xwe hunermendê şêwekar Rehbar dibe.
Ew di sala 1981'ê de ji ber rewşa siyasî ji herêma Kurdistanê derdikeve û di sala 1982'yan de li Fransayê bi cih dibe.
Di sala 2002'an de Şêerko dikeve nav rojnamegriya kurdî û dibe pêşkêşvanê bernameya "Rojbaş Kurdistan" di kenala Roj TV de û li pay; wê dibe amadekar û pêşkêşvanê bernama "Tîşkî Huner" ku ronî da ser hunera şêwekarî û hunermendên kurd.
Di sala 2012'an de bernama "Rêjney Reng" di kanala Stêrk TV pêşkêş dikir.
Ji bilî karê wî di medya kurdî de, ew stranbêj bû û helbestvanekî zîrek bû.
Şêwekar Şêrwan li ser wî dibêje: "Şêrko erşîfekî pirr hêja li paş xwe hişt ji belgefilimên li ser hunermendên kurd û hunera kurdî û xizmetek mezin ji hunera kurdî re kir û ew ked nayê jibîr kirin "