Dadgeheke Tirkîyê do Sêşemê jibo 3 rojnamevanan biryara girtînê da û 3 rojnamevanên din jî bi şertê kontrola dadî berda. Her 6 rojnamevan 24 roj desteserkirî mabûn.
Edîtorê malpera Diken'ê Tunca Ogreten, edîtorê Ajansa Nûçeyan ya Dîcleyê (DIHA) Omer Çelîk, xebatkarê rojnameya Bîrgun'ê Mahir Kanaat, berpirsê Ajansa Nûçeyan ya Etkîn (ETHA) Derya Okatan, nûçgehînê DIHA'yê Metîn Yoksun û xwedîya îmtîyaza kovara Yolculuk’ê Eray Saygin piştî 24 roj hatin darizandin.
Dadgeha 8'an ya Sûlh û Cezayî ya Stenbolê, Okatan, Yoksun û Saygin bi şertê kontrola dadî serbest kirin, lê Ogreten, Kanaat û Çelîk bi tawana ''endambûna rêxistinê'' hatin girtin.
Hêjayî balkişandinê ye, Çavdêrîya Mafên Mirovan (HRW) di raporta xwe ya berî van girtinan de dîyar kiribû ku li Tirkîyê 147 rojnamevan girtî ne û ji hewila darbeyê vir ve 169 sazîyên çapemenîyê hatine girtin.