Ajansa Reuters ji zarê televîzyona dewleta Sûrî ragihand ku artêşa wî welatî îro Duşemê deverên dawî li başûrê Şamê ji kontrola Dewleta Îslamî (DAIŞ) derxistin û paytaxt bi tevahî ji mîlîtanan paqij kirin.
Hêzên ser bi hikûmetê ji çend hefte vir ve hewil didan ku taxa el-Hajar el-Aswad û kampa Yarmuk ya penaberên Fîlîstînî bigirin bin kontrola xwe.
Televîzyona dewletê ragihand ku wateya azadkirina taxa el-Hajar el-Aswad, bi temamî paqijkirina herêma başûrê Şamê ji xirabkaranan e.
Piştî têkçûnên dawî, DAIŞ niha tenê du deverên li sahra ya rojhilata Sûrîyê kontrol dike ku di bin dorpêçkirinê de ne.