Serokê Amerîka Donald Trump, ku jibo derbazkirina behnvedanê bi hevjîna xwe Melanie li bajarê Palm Beach ya Florîda ye, bi mesajeke vîdyoyî Krîstmis ji Amerîkîyan re pîroz kir.
“Ez û Melanie Krîstmisa we yek û yek pîroz dikin û taybetî jî ji endamên leşkerîya me re ku li aniha li dervayê welêt in, Krîstmiseke hêja dixwazin. Em ji wan re dûayên taybet dikin û hêvî dikin ku aştî di nav gelan de pêk were û şabûn li her derê cîhanê belav be.”
Di roja Krîstmisê de Amerîkî û bi mîlyonên mirovên seranser cîhanê dayikbûna Mesîh Îsa pîroz dikin.
Ev roja girîng li Amerîka wek roja behnvedanê ya fermî ye û ofîsên hikûmetê, xwendingeh û herwiha piranîya firoşgehan girtî ne.
Di vê rojê de Amerîkî serdana hezkirîyên xwe dikin, ji hevdu re dîyarîyên hêja pêşkêş dikin û dayikbûna Mesîh Îsa bi awayê herî dilgeş pîroz dikin.
Krîstmis taybetî jibo zarokan rojeke girîng e jiber ku gelek ji wan li bendê ne Bavê Noel anku Santa Claus ji wan re dîyarîyên rengûreng bîne.