Li ser Rojnamegerên Kurd Operasyonek Hevdemî Pêk hate
Bi biryara Serdozgerîya Stembolê, li bajarên Stembol, Enqerê û li Ruhayê, 9 rojnamevanên Ajansa Mezopotayma û Rojnameya Yenî Yaşamê di serdegirtina malan de hatin desteser kirin, lê sedema operasyonê nehat eşkere kirin.
Komela Rojnamevanên Dîcle û Firatê û Komela Rojnamevanên Jin yên Mezopotamya bi daxuyanîyên cuda desteserkirina rojnamevanan şermezar kirin.
Ajansa Mezopotamya ragihand ku rojnamevanên desteserkirî Mehmet Aslan, Esra Solîn Dal, Erdogan Alayamut, Enese Sezgîn, Salîha Aras, Yelîm Alici, Şirin Ermîş, Beset Argat Balci û Dogan Kaynak in.
Bi alîyekî din ve, êvara Duşemê polîsên Belçîka avêtin ser navenda kanalên Stêrk TV û Medya Haber TV ku li nêzî Brukselê ye.
Rêvebirên kanalan ragihand ku polîsan bi awayekî neqanûnî, dema ti rêvebir li avahîyê tunebû, ew êrîş pêk anî.
Jêder: Ajansa Mezopotamya