Hikûmeta Îranê du girtîyên siyasî yên Kurd, Eşkan Melekî û Mihirdad Mihemedînîya, bi dizî sêdare kirin. Ev herdu ciwan xelkê Qurweyê bûn û di xwepêşandanên meha Çileya 2026'an de hatibû girtin. Dadgeha Îranê ew bi "dijminatîya Xwedê" (moharebeh) tawanbar kirin û cezayê darvekirinê da wan.
Rêxistina Mafên Mirov Hengaw îro Duşemê ragihand ku Melekî û Mihemedînîya, serê sibê li Girtîgeha Qizilhesar a bajarê Kerecê hatin sêdarekirin. Ev pêvajoya bi dizî pêk hat û rê nedan ku ev herdu girtî cara dawî malbatên xwe bibînin.
Li gor Hengawê, metirsî li ser jiyana girtîyê sêyem ê bi navê Arman Marefatî herwiha zêde ye. Marefatî ciwanekî Kurd e û niha li Girtîgeha Mezin a Tehranê ye.
Ajansa nûçeyan a Mîzanê ku ser bi dadwerîya Îranê ve ye, di raportekê de sêdarekirina Melekî û Mihemedînîya piştrast kir.
Dadgeha Şoreşê ya Tehranê ev cezayê darvekirinê piştî êşkenceyeke giran û axaftinên bi zorê da.
Dadgeha Îranê her sê girtî tawanbar kirin ku wan di xwepêşandanên Çileyê de agir berdaye mizgeft û navendeke olî li Tehranê. Berîya sêdarekirinê, rejîma Îranê îddîa kir ku wan "ji bo Îsraîlê kar kirîye."
Piştî xwepêşandanên Çileyê û operasyonên Amerîka û Îsraîlê yên li dijî rejîma Îranê, rejîmê sêdarekirina welatîyan berdewam dike.