Raporeke salane ya îstîxbarata hundûrîn ku ji alîyê Wezareta Navxwe ve roja Pêncşemê hatî weşandin nîşan dide ku jiber ramanên tûnd hem yên çepgir û hem jî yên rastgir tawanên cezayî di sala 2019an da li Almanyayê bilind bûne.
Hikumeta Şansolye Angela Merkel, sala borî jiber tûndûtîjîya sîyasî ya baskê rast-giran neçar ma ku bilive piştî kuştina sîyasetmedarekî dostê penaberan û êrişa ser sînegok û xwaringehekê ji alîyê çekdarekî antî-Semîtîc ku du kes kûştî bûn. Jiber zêdebûna wan tawanên nefretê, hikumetê pîvanên dijwartir danan ser xwedîbûna çekan û bi rijdtir çavdêrîya axiftinên ser înternetê destpê kir.
Doneyên Wezareta Navxwe dîyar dike ku kesên xwedanên ramanên tûnd yên baskê rast-gir, di sala 2019an da zêdetirî 22.300 tawanên giran kirin, di nav van da du kûştin, pênc hewildanên kûştinê û hemen hemen 800 birîndarkirinên laşî çêbûn ku ew jî bilindbûneka %10 nîşan dide.
Thomas Haldenwang, serokê saziya ewlehiya navxweyî ya BfV, got tawanên antî-Semîtîk %17 bilind bû û % 94 tawanên wekî birîndarkirina mirovan, cûn kirin û yên antî-Semîtîk ji alîyê sempatîzanên baskê rast-gir ve hatine kirin.
Wezîrê Navxwe Horst Seehofer got zêdebûna tawanên krîmînal yên ji alîyê kesên baskê rastgir ve dihên kirin li dijî biyanîyan û Misilmanan bilind bûye. Wî herwiha got "Em divêt hişyar û amade bin da ku çalakiyê bikin".