Fermandarîya Navendî ya Amerîkayê (CENTCOM) dibêje ku hêzên Amerîkayê di mehên dawî de ji bo bi hezaran keştîyan di Tengava Hormuzê de rêyeke ewle peyda kirine, di demekê de ku dorpêça deryayî ya li ser Îranê berdewam dike.
Fermandarê CENTCOM'ê Brad Cooper îro Şemîyê got, "Hêzên CENTCOM'ê piştgirî dane zêdetirî yek milyar bermîl petrola xav ku ji Kendavê derbas dibin. Ev tê vê wateyê ku yek milyar bermîl petrola xav ji Tengava Hormuzê derketiye."
Cooper got ku hêzên Amerîkayê di du mehên dawî de zêdetirî 2,000 keştîyên bazirganî parastine.
Wî got, "Zelal e ku bandora me berfireh dibe û rêyên serekî yên di tengavê de ji mayînan têne paqijkirin û bi hezaran keştî ji tengavê derbas bûne."
Fermandarê CENTCOM'ê bandora cezayan li ser Îranê tekez kir ku "ji ber cezayên me yên hesinî dilopek petrol jî nehatiye hinardekirin."
Cooper ragihand ku di du hefteyên borî de barên petrola xav û gaza xwezayî ji her demê di şeş mehên borî de zêdetir bû.
Tevî vê pêşketinê, wî piştrast kir ku Amerîkayê ligel şeş welatên Ereb ên Civata Hevkarîya Kendavê û kompanîyên bîme û barkirinê dixebite da ku qebareya vuguhestinê li Tengava Hormuzê zêde bikin.
Wî got, "Emê bi hemû hevkarên herêmî re bixebitin, parastina wan a esmanî xurt bikin, yekîneyeke nû ya dronên êrîşê yên hevpeymanîyê ava bikin, û Tengava Hormuz û avên derdorê vekirî bihêlin."