Serokê Partîya Gel ya Komarî (CHP) Ozgur Ozel serdana Partîya Wekhevî û Demokrasî ya Gelan (DEM Partî) kir.
Ozel piştî serdanê dîyar kir ku danûstandina û dîyaloga di navbera partîyan de yek ji şertên aştîya civakî û demokrasîyê ye.
‘’Em ser Tirkîyê û cîhanê axifîn. Ez dikarim bibêjim ku hevdîtineke baş û avaker bû. Di peyvajoyên pêş de wê dîyalog û danûstandinên me bidomin.’’
Wî got ku ew bawer dike ku wê dîyalog û danûstandin jibo demokrasîya Tirkîyê kêrhatî bin.
Hevserokê DEM Partî Tuncer Bakirhan jibo serdanê spasîya Ozel kir.
Bakirhan got ku partî bi dîyalogê kêşeyan çareser dikin û dîyar kir ku divê partîyên rikeberîyê danûstandinê bikin.
Hevseroka DEM Partî Tulay Hatîmogullari jî got ku wan bêrîya dîyalogê kiriye û dîyar kir ku jibo çareserîyê divê danûstandin hebe.
Hatîmogullari dîyar kir ku di dîroka Tîrkîyê de partîyên sîyasî bi hev re zêde nedane û nestandine.
Wê got ku ew hêvî dike ku hemî partîyên sîyasî yên Tirkîyê di demên pêş de jibo pêşketina demokrasîyê rêkên dîyalogê vekirî bihêlin û ew bi hev re pêşve herin.
Jêder: Ajansa Mezopotamya