Gotûbêja yekê ya hilbijartina seroktîyê, di navbera berbijara Demokrat Hillary Clinton û hevrikê wê yê Komarî Donald Trump de, şeva Duşemê li Zanîngeha Hofstra ya eyaleta New Yorkê hate kirin.
Tê texmîn kirin ku pirtir jî 100 mîlyon kes ew gotûbêj bi zindî temaşe kir û derfet dît ku nêrîn, plan û projeyên berbijaran ji nêzîk ve bibîhsin.
Yek ji mijarên girîng ku di gotûbêjê de hate nirxandin rewşa aborîya Amerîka bû û Clinton pêşnîyar kir ku divê baca kesên dewlemend were bilind kirin, mûçeya karkeran were zêde kirin, pirtir dirav jibo binesazî û projeyên avakirinê re bêne xerc kirin û di kar de jin bi qasî pere wergirin.
Trump dijberîya xwe li pêşnîyarên Clinton bilind kir û got ku gelek karên Amerîkî ber bi welatên din ve diçin, sedemeke wê yekê peymanên bazirganî ye ku Clinton jî piştgirî dabû.
Trump rexne li Clinton û Serokê Amerîka Barak Obama kir ku nekarîne pêşî li çûyîna karên Amerîkî ji welatên din re bigirtana. Wî bi tundî berevanî li kêmkirina bacên dewlemendan kir, bi sedema ku ew kes xwedîyê karên afirandî ne.