Koma Filîstînî ya Îslamî, Hamasê îro Şemîyê ragihand ku yek ji rehîneyên din yên di êrîşên 7’ê Cotmehê de hatibûn revandin canê xwe ji dest daye.
Hamasê vîdyoyek belav kir ku nîşan dide ku Nadav Popplewell yê li Kibbutz Nirim ya li başûrê Îsraîlê dîl hatiye girtin, li Gaza bi êrîşeke Îsraîlê birîndar bûye û piştre miriye.
Artêşa Îsraîlê ser vîdyoya Hamasê hîn ti şirove nekiriye.
Karbidestên Îsraîlê derbarê vîdyoyên berê yên ser rehîneyan gotibûn ku terora psîkolojîk e.
Hamasê Îsraîl berê jî bi kuştina rehîneyan tawanbar kiribû, lê Îsraîlê ew îdia sûcdarkirin red kiribûn.
Koma Filîstînî serê roja Şemîyê vîdyoyeke bê dîrok yê rehîneyê 51 salî weşand ku çavê wî yê rastê mor e û navê xwe dibêje.
Di vîdyoya duyê de, ku çend saetan piştî vîdyoya yekê hat weşandin, tê gotin ku Popplewel meheke berê di êrîşa Îsraîlê de birîndar bûye û bi wan birînan canê xwe ji dest daye.
Hamas dîyar kir ku Popplewel hemwelatîyê Brîtanya ye û ragihand ku dema Îsraîlê bi muşekan êrîş li dar xistiye, rehîneyeke din ya jin jî li cem bûye.
Berdevikê Hamasê Ebu Ubeyde got ku bi êrîşên Îsraîlê nexweşxane hilweşîne û Popplewel jiber nebûna çavdêrîya krîtîk canê xwe ji dest daye.
Îsraîl dide zanîn ku di êrîşên 7’ê Cotmehê de 252 kes hatine revandin û 128 ji wan li Gaza mane.
Komîteya tiba adlî ya Îsraîlê ragihand ku bi kêmî ve 36 rehîneyan canên xwe ji dest dane.
Karbidestên Îsraîlê dibêjin ku ew jibo serbestbûna rehîneyan û pûçkirina Hamasê, ku ji 2007’an vir ve herêmê bi rêve dibe, operasyona li Gaza li dar dixe.
Koma piştgirîya ya jibo rehîneyan dîyar dike ku Popplewell tevî dîya xwe ji mala xwe ya li Kibbutz Nirim hatiye revandin.
Ew kom radigihîne ku birayê Popplewell dema êrîşan hatiye kuştin û dîya wî dema agirbesta meha Mijdarê hatiye berdan.
Jêder: Reuters
Hamas Mirina Rehîneyekî Din Radigihîne
