Wezareta Pêşmerge ya Hikûmeta Herêma Kurdistanê ragihand ku li navçeya Soranê di du êrîşên cuda yên mûşekên balîstîk ên li ser hêzên Pêşmerge de, 6 Pêşmerge hatin kuştin û 30 jî birîndar bûn.
Wezareta Pêşmerge di daxuyanîyekê de îşaret bi rejîma Îranê da û got ku "Serê sibeha îro Sêşemê 24'ê Adarê di du êrîşên cuda de, li ser baregehên Firqeya 7'an a Piyade ya Herêma Yek û Firqeya 5'an a Piyade ya Hêzên Pêşmerge li Soran de hate kirin. Bi şêweyekî xedir û xiyanetkarane dûr ji nirxên mirovî û cîranîyê, 6 mûşekên balîstîk ên Îranê li hêzên Pêşmerge ketin. 6 Pêşmerge şehîd bûn û 30 jî birîndar bûn."
Wezareta Pêşmerge got: "êrîşên terorîstî yên li ser Herêma Kurdistanê bi tundî şermezar dikin û dîsa dupat dikin ku mafê me heye em li dijî her êrîşekê ku gel û axa me dikin aramanc rawestin. Viyana aştîyane dê biserbikeve."
Dengê Amerîka hewl da ku raya Qaymeqanê Xelîfan ê Rêveberîya Xweser a devera Soran û Wezareta Pêşmerge li ser êrîşê werbigire, lê heta amadekirina vê nûçeyê bersiv nebû.
Serokê Herêma Kurdistanê Nêçîrvan Barzanî ser X'ê got: "Em êrîşa mûşekî ya Îranê ku îro li ser sînorê Rêveberîya Soranê bingehên hêzên me yên Pêşmergeyan armanc girt û di encamê de çend Pêşmergeyên me yên wêrek şehîd bûn û birîndar bûn, bi tundî şermezar dikin. Em sersaxîyên xwe yên kûr ji malbat û hevkarên şehîdan re dixwazin û bi wan re di nav hevgirtinê de ne; em ji birîndaran re başbûneke bilez dixwazin."
Serokê Herêmê herwiha got: "Em bang li hikûmeta federal a Îraqê û civaka navneteweyî dikin ku hewlên xwe zêde bikin da ku pêşî li dubarebûna êrîşên bi vî rengî bigirin û serwerîya axa Îraq û Herêma Kurdistanê biparêzin."
Serokwezîrê Hikûmeta Herêma Kurdistanê Mesrûr Barzani jî sersaxî ji malbatên qurbanîyan re xwest.
Serokwezîr got, "Em êrîşa xiyanetkar û dijminkarane ya li ser baregeha Pêşmergeyan şermezar dikin, ku di encamê de şeş Pêşmergeyên qehreman şehîd bûn û 30 din jî birîndar bûn."
Wî got "Ez sersaxî û aramîya xwe ya ji dil ji malbatên şehîdên rast re dixwazim, bi germî ji Xwedayê mezin lava dikim ku zû şîfayê bide birîndaran."
Wezareta Pêşmerge bang li hemû alîyan kir ku ji şer û kaosê li Herêma Kurdistanê dûr bikevin.
"Divê hikûmeta federal, civaka navneteweyî û hemû dost li hember van binpêkirinan bêdeng nemînin û dawî li van êrîşên bêwijdan bînin," Wezaretê got.
Li gorî Tîma Rêxistina CPT, Pasdarên Şoreşa Îranê û komên girêdayî wê yên Îraqî ji dema destpêka operasyona Amerîka û Îsaîlê ya ser rejîma Îranê ve, 307 êrîş li Herêma Kurdistanê pêk hatine. Di encamê de heşt kes hatine kuştin û 51 kes jî birîndar bûne. Lê belê ev hejmar niha pir zêde bûye û tê payîn ku di rojên bê de hejmarên nû eşkere bibin.