Pasdarên Îranê îro Çarşemê bi mûşek û dronan êrîşî Urdun, Kuweyt û Behreynê kirin. Piştî êrîşa Îranê, reaksyonên cuda ji welatên Ereb derketin.
Wezareta Derve ya Kuweytê êrîşên Îranê bi tundî şermezar kirin û got ku êrîşên berdewam ên Îranê provokasyoneke metirsîdar e li ser jiyana sivîlan.
Di daxuyanîyekê de, Wezaretê tekez kir ku "mafê tevahî yê Dewleta Kuweytê ye ku hemû gavên pêwîst bigire da ku ewlehîya xwe biparêze."
Êrîşên Îranê li ser welatên Urdun, Kuweyt û Behreynê ew welat xistin rewşa amadebaşîyê, di demekê de ku Urdunê çend mûşekên Îranê teqandin, Kuweyt û Behreynê jî zingilê hişyarkirinê lêda û sîstemên xwe yên berevanîya esmanî li dijî her êrîşeka pêkan çalak kirin.
Wezareta Derve ya Qeterê "bi tundî êrîşên Îranê şermezar kir, ew wekî binpêkirineke eşkere ya serwerîya van neteweyan û binpêkirineke eşkere ya prensîbên qanûna navneteweyî binav kir."
Ji alîyê xwe ve, Wezareta Derve ya Îmaratê êrîş bi tundî şermezar kir, û ew wekî bizaveke terorîstî binav kir.
Misirê jî êrîşên Îranê wekî "binpêkirina eşkere ya serwerîya dewletê û yekparçeyiya axê" binav kir.
Di daxuyanîyekê de, Wezareta Derve ya Misirî "hevgirtin û piştgirîya xwe ya tevahî bi Urdun, Behreyn û Kuweytê re li hember van kiryarên êrîşkarî yên nepejirandî" piştrast kir. Qahîre herweha piştgirîya xwe ji bo "hemû tedbîrên ku ji bo parastina ewlehî û aramîya wan û ji bo parastina welatîyan û samanên wan ên neteweyî hatine girtin" destek kir.
Sekreterê Giştî yê Komkara Welatên Ereb, Ehmed Ebû el-Xeyt, bi gotinên herî tund êrîşa hovane ya Îranê şermezar kir.
Karbidestê Komkara Ereb di daxuyanîyekê de îro Çarşemê nîgeranîya xwe ya kûr li ser êrîşa berdewam a Îranê li dijî deverên Ereb, wekî rêbazek ji bo zêdekirina alozîyê anî ziman. Wî dîyar kir ku ev rêbaz nayê qebûlkirin û stratejîyekê eşkere dike ku hem ewlehîya herêmî ya Erebî ne rehet dike û hem jî civaka navneteweyî zirtanbazî dike.
Hêjayî gotinê ye Behreyn îro Çarşemê mêvandarîya 167'emîn civîna encûmena Wezîran a Encûmena Hevkarîya Kendavê (GCC) dike.