Berpirsên partiyên rojhilat ji Dengê Amerîka re dibêjin ku rejîma Îranê ji dawîya Sibatê ve heta niha bêtirî 423 êrîş li ser bingehên wan li Herêma Kurdistanê pêk anîne.
Di encama van êrîşan de 20 kes hatine kuştin û bi dehan kes jî birîndar bûne.
Li gor amarên ku gihîştine Dengê Amerîka, êrîşên herî zêde li dijî Partîya Demokrata Kurdistana Îranê (PDKÎ) bûne û êrîşa herî kujer jî li dijî Komeleya Şoreşgêr e.
Amanc Zîbayî, endamê rêveberîya Partîya Demokrata Kurdistana Îranê, ji Dengê Amerîka re got ku ji şerê 40 rojî ve, 150 caran êrîşî partîya wan hatiye kirin. Di encamê de sê endam hatine kuştin û neh endamên din jî birîndar bûne.
Emced Hisên Penahî, endamê komîteya rêveber a Komeleya Zehmetkêşanên Kurdistanê, ji Dengê Amerîka re got ku di hefteyên dawî de 97 caran bingehên partîya wan hatine armancgirtin. Endamek ji Komele hatiye kuştin û 18 kesên din jî birîndar bûne.
Êrîşa dawî ya li ser Partîya Komeleya Zehmetkêşan îro Şemîyê, 1'ê Tebaxê, pêk hat, dema ku du dronan êrîşî baregeha wê ya li navçeya Dukanê kir. Di êrîşê de ti qurbanî çênebûn.
Edîb Xalidîyan, berdevkê Partîya Azadiya Kurdistanê (PAK), got ku partîya wan rastî 95 êrîşan hatiye, du endamên PAK'ê hatine kuştin û 40 endamên din jî birîndar bûne.
Îdrîs Kulahdozî, endamê komîteya navendî û serokê ragihandinê yê Komeleya Şoreşgêr li Silêmanîyê, ji Dengê Amerîka re got ku rejîma Îranê ji destpêka Operasyona Hêrsa Dastanî di 28'ê Sibatê de 41 êrîş li ser partîyê kirine. Di encamê de 12 kes hatine kuştin, lê hejmara birîndaran ne diyar e.
Efsana Rehîmî, endama komîteya navendî ya Sazmana Xebata Kurdistana Îranê, ji Dengê Amerîka re got ku partîya wan bûye armanca 40 êrîşan. Di wan êrîşan de du kes hatine kuştin û heşt kes jî birîndar bûne.