Serokwezîrê Herêma Kurdistanê Mesrûr Barzanî, îro Yekşemê ragihand ku niha asta têkilîyên di navbera Hewlêr û Bexdayê de "gelek baş" in.
Barzanî di merasîma vekirina projeya avê ya Balinda Barzan de, piştgirîya herêmê ya berdewam bo Serokwezîrê Îraqê Elî Zeydî û hikûmeta wî nû kir. Her wiha destnîşan kir ku divê mafên destûrî yên gelê Kurdistanê mîna hemû Îraqîyan werin parastin û dawî li polîtîkayên berê yên cudakarîya navbera herêmê û parêzgehên din were anîn.
Di derbarê şerê li dijî gendelîyê de, Barzanî piştgirîya Herêma Kurdistanê bo helmeta ku vê dawîyê ji alîyê Zeydî ve hatibû destpêkirin ragihand, û herêm wek hevpareke bingehîn a Bexdayê di vê erkê de pênase kir, daku ev pêngav bibe sedema baştirkirina rewşa aborî, siyasî û ewlehî li seranserî Îraqê.
Li ser asta navdewletî û herêmî, Mesrûr Barzanî tekez kir ku Herêma Kurdistanê ne alîyek e di şer û pevçûnên niha yên Rojhilata Navîn de û naxwaze bikişe nav van alozîyan. Di heman dem de wî êrîş û bumbebaranên berdewam ên li ser herêmê şermezar kirin û daxwaza rawestandina van destdirêjîyan kir, ku zirarê didin her kesî.
Li ser asta navxweyî ya herêmê jî, Barzanî tekez li ser pêwîstiya aktîfkirina Parlamena Kurdistanê kir.