Rêber û rêxistinên navneteweyî îro Înê, bi sedema salvegera 25’an ya êrîşên terorî yên 11’ê Îlona 2001’an, peyamên biranînên û piştgirîya bi Amerîkayê re ragihandin.
Sekreterê Giştî yê Neteweyên Yekbûyî (NY) António Guterres, nêzî 3,000 qurbanî, kesên saxmayî û rizgarkerên wê demê bi bîr anî.
Guterres, êrîş wekî “êrîşeke dijî mirovahîyê” binav kir û ji bo pêşîgirtina li terorê banga hevkarîya navneteweyî ya xurttir kir.
Serokwezîrê Brîtanya Andy Burnham, qurbanîyên êrîşan, ku di nav de 67 welatîyên Brîtanî jî hebûn, bi bîr anî.
Burnham got ku teror “hîn jî li dezîyê demokrasîyê dixe,” lê Brîtanya û Amerîka bi hev re yekgirtî ne.
“Brîtanya û Amerîka jibo bibîranîna kesên ku me winda kirine û di berevanîya nirxên ku jibo me girîng in, bi hev re disekinin,” wî got.
Serokwezîrê Kenedayê Mark Carney jî qurbanî bi rêzdarî bi bîr anîn û jibo piştgirîya bi gelê Amerîkî re bang kir.
Serokwezîrê Awistralyayê Anthony Albanese, Wezîra Derve Penny Wong û Wezîrê Berevanîyê Richard Marles daxuyanîyeke hevpar weşandin. Wan 2,977 qurbanî, ku di nav de 10 Awistralyayî hebûn, bi bîr anîn û ser wêrekîya rizgarkeran rêzdarîya xwe anîn ziman.
"Em bîranîna wan bi rêzdarî bi bîr tînin û em biryardarîya xwe ya dijî terorîzm û tundrewîya bi her cûreyê de tundûtûjîyê dubare dikin," wan gotin.
Serokwezîrê Îsraîlê Benjamin Netanyahu jî di peyameke kurt de, jibo Amerîka piştgirîya xwe destnîşan kir û got, “Bîst û pênc sal piştî 11’ê Îlonê: Em bi bîr tînin. Em bi hev re ne. Emê terorê têk bibin.”
Ji Herêma Kurdistanê, Serokê Yekîtîya Niştimanî ya Kurdistanê (YNK) Bafil Celal Talebanî bi peyameke fermî qurbanîyên 11’ê Îlona 2011’an bi bîr anî û ji malbatên wan û gelê Amerîkî re piştgirîya xwe ragihand.
Talebanî got ku 11’ê Îlonê hîn jî encamên wêranker yên terorê û berpirsiyarîya hevpar ya rûbirûbûna bi tundrewîyê tîne bîra mirovan.
Wî bang kir ku welat ji bo “aşitî, ewlehî û mirovahîyê” bi hev re bixebitin.
Hêjayî gotinê ye ku di êrîşên El-Qaîde yên 11’ê Îlona 2001’an de, li New Yorkê, Pentagonê û Pennsylvania bi giştî 2 hezar û 977 kes hatin kuştin.