Di hevpeyvîneke taybet de Sîpan Hemo, Fermandarê Giştî yê Yekîneyên Parastina Gel (YPG) li ser jimareke mijarên girîng bersîva Dengê Amerîka dide.
Birêz Hemo dibêje, ew ji Hesekê heta Çemê Feratê û Ain Îsa şerekî dijwar li dijî DAIŞê dikin û serkeftinên girîng dest dixin.
“Di enîya şer de, tekoşîna me li dijî rêxistina terorîst DAIŞ berdewam dike û herî dawî me Sirîn û Hesekê rizgar kirin. Li ku derê be bila bibe, emê şerê xwe yê bo mirovahî bidomînin.”
Hemo dide zanîn ku ew û Amerîka li dijî terora DAIŞ tekoşîneke hevbeş didin û emcanên girîng dest dixin.
“Firokên esmanî yên Amerîkî di gelek enîyan de alîkarîya me dikin û em bi hevre encamên pir girîng bi dest dixin. Daxwaz û hêvîya me ev hevkarîya heyî baştir be. Em ji hevkara xwe Amerîka dixwazin ku çekên giran, tecrube û alavên nû yên pêşketî bide me ku em bikanibin hîn bi bandor şerê terorîzmê bikin.”
Hemo bang li Amerîka û welatên cîhanê dike ku nehêlin hîn dewletên herêmê tekoşîn û serketina heyî bo berjewendîyên xwe yên biçûk kar neyînin.
Hemo balê dikşîne ser planên Tirkîyê yên vê dawîyê ku dixwaze bi karanîna Tirkmenan “herêmeke ewle” li navbera Cerablus û Azazê damezrîne.
“Tirkîyê bi rêya Tirkmenan dixwaze pêşîya YPG bigire ku kantonên Kobanê û Efrînê negihîne hevdu û jibo wê armancê jî Tirkmenan bi kar tîne. Tenê % 1,5 nîfûsa Sûrîyê Tirkmenan in û li herêma ku êTirkîye dixwaze herêma ewle dayne, tenê 7 gundên Tirkmenan hene ku Kurd jî li wna gundana dijîn. “
Hemo dibêje, eger xema Tirkîyê bi rastî rewşa civaka Tirkman be, dive li herêmên din biêre ku nîfûseke mezintir ya Tirkmenan lê dijîn.
“Tirkîyê çima li Îdlib û Lazqîyê xwedî li Tirkmenan dernakeve jiber ku li wan deran pirtir Tirkmen dijîn. Lê, em zanin ku armanc ne Tirkmen in, lê tunekirina destketinên gelê Kurd li Rojavayê Kurdistanê ye.”
***
Kerem ki li her du beşên vê hevpeyvîna taybet ya ligel birêz Hemo guhdar bikin:
Beşa Yekê
***
Beşa Duyê