Wezîrê Karê Navxweyî yê Tirkîyê Suleyman Soylu bergirî li danîna qayumê ya ser Bajarvanîya Qersê kir û got ku li Qersê hewildanên avakirina rêvebirîya xweser hebû.
Soylu bo ajansa taybet a nûçeyan IHA’ê ragihand ku dadgeh, îstixbarat û hêzên ewlekarîyê tesbît kirine ku bajarvanîya Qersê li gor fermanên çîya tev gerîyaye û di bin bandora kesên ku bi rêxistina terorî tekildar de maye.
Soylu bi berdevamî got ku ew avakirina rêvebirîya xweser qebul nakin û herwiha demokrasî û hiqûq jî vê yekê qebûl nake.
Parlamanterê Partîya Demokratîk a Gelan (HDP) yê Îdirê Habîp Eksîk gotinên Soylu red kir û got ku ew dixwazê tayînkirina qayuman rewa nîşan bide.
“Di meclîsa şaredarîya Qersê de Partîya Dad û Pêşvebirinê (AKP), Partîya Tevgera Netewperest (MHP), Partîya Komarî a Gel (CHP) û herwiha partîyên din jî hene. Bîryar bi dengê hemî partîyan dihat wergirtin û wek Soylu got bîryar ji çîya nedihat.”
Eksîk da zanîn ku avakirina xweserîya demokratîk di rêzik nameya HDP’ê de jixwe heye û armanç demokratîkirina Tirkîyê ye.
Cigera Seroka koma HDP’ê Meral Daniş Beştaş li parlamana Tirkîyê di preskonferansê de got ku niha ji 65 bajarvanîyan tenê 6 bajarvanî di destê HDP’ê de mane.
Beştaş anî ziman ku danîna qayuman êrîşa ser vîna gel e.
Hêjayî bîrxistinêye ku hevbajarvanên Qersê Bîlgen û Alaca di serê meha Cotmeyê de bi îdiaya "têkbirina yekîtîya dewletê" û “endamtîya rêxistina terorê” ligel 21 sîyasetvanên Kurd hatibûn zîndan kirin.
Wezareta Karê Navxweyî jî li şûna wan walîyê bajêr wek qayum bo Bajarvanîya Qersê dîyar kiribû.