Serşêwirmendê Serokomarê Tirkîyê Mehmet Uçum dîyar kir ku jibo serokomarê welêt Recep Tayyîp Erdogan jinûve bibe namzed divê hilbijartin berî dema wê ya asayî çêbe.
Uçum di kanala CNN Turkê de got ku li gor qanûna bingehîn ya welêt gerek ew berî 7ê Gulana 2028an herin ser sindoqan. Wî dîyar kir ku pêşnîyaza wî ya bo dema hilbijartinan 16ê Nîsana 2028an e û bi bîr xist ku ew roj roja salvegera referanduma sîstema hikûmeta serokomarîyê ye.
Li gor qanûna bingehîn ya Tirkîyê, ger hilbijartin di dema asayî da çêbin serokomar li ser hev herî zêde du caran dikare bibe namzed. Erdogan di sîstema nû da sala 2018 û sala 2023an li ser hev bû namzed û hat hilbijartin.
Jibo hilbijartina pêşwext çêbibe divê parlemana Tirkîyê wê bi 360 dengan erê bike. Li parlemanê 331 kursîyên Tifaqa Komarî hene ku ew bi hevbendîya Partîya Dad û Pêşvebirinê (AKP) û Partîya Tevgera Neteweparêz (MHP) çêbûne.
Şêwirmend paye bilind Uçum got li gor daxuyanîyên dawî yên AKP, MHP û Partîya Gel ya Komarî (CHP) 371 kursî li alîyê hilbijartina dema wê li pêş disekinin.
Gotûbêjên ser hilbijartina pêşwext ev demek e di rojeva Tirkîyê da ne.
Erdogan 17ê Îlonê gotibû ew bawer dike ku ewê wan hilbijartinan jî derbaz bikin ku hêdî hêdî nêzîk dibin.
Serokê Parlemana Tirkîyê Numan Kurtulmuş 25ê Îlonê gotbû ku niha ne dem û cîhê hilbijartina pêşwext e. Serokê MHPê Devlet Bahçelî banga hilbijartina pêşwext kir û got ku divê ew pêşîya namzedbûna Erdogan vekin.
Li alîyê muxalefetê, jêderên Partîya Wekhevî û Demokrasî ya Gelan (DEM Partî) dibêjin rojeva wan niha ne hilbijartina pêşwext e û ew ya zêdetir ser prosesa çareserîyê disekinin. Serokê CHP’ê Kemal Kiliçdaroglu hefteya borî got ku ger desthilat biryara hilbijartina pêşwext bide ew ê dijî wê nasekinin. Yenî Partî ya bi rêberîya Ozgur Ozel jî banga hilbijartina pêşwext dike.