Serokê Amerîka Donald Trump û Serokomarê Tirkîyê Recep Tayyîp Erdogan li Qesira Sipî preskonferanseke hevbeş li dar xistin.
Her du serok di preskonferansê ser Kurdên Sûrîye û Tirkîyê axifîn.
Trump da zanîn ku ew bi Erdogan re derbarê rewşa dawî ya Sûrîyê peyivîye û ew jiber Rojhilata Navîn ya di aştîyê de spasîya Erdogan dike.
‘’Min meha borî Pence û Pompeo şandibbûn. Xebatên bo bidawîkirina pevçûnên li Sûrîyê bi ser ketin û em dibînin ku agirbest didome.’’ Trump got.
Wî ser peywendîyên bi Hêzên Sûrîya Demokratîk (HSD) re, ku Yekîneyên Parastina Gel (YPG) pêşengîya wê dike, dîyar kir ku peywendîyên wan û Kurdan pir baş in û ew di têkoşîna dijî Dewleta Îslamî (DAIŞ) de bi ser ketine.
Serokê Amerîka ser kuştina Rêberê DAIŞ’ê Ebubekir El Bexdadî jî got ku Tirkîyê alîkarî kiriye û ew spasîya wan dike.
Erdogan jî di axaftina xwe de dîyar kir ku di navbera wan û Kurdan de ti kêşe tune û têkoşîna wan dijî terorê ye.
Wî amaje kir ku di partîya wî de pirtirê 50 parlamanterên Kurd hene.
Serokomarê Tirkîyê ser vexwendina Mazlum Kobanî bo Washingtonê jî peyivî û da zanîn ku helwesta Amerîka bo wan dilgiranîyê çêdike.