Artêşa Ukraynayê roja Yekşemê got hêzên wê êrîşek li devera Blahodatne li rojhilatê herêma Donetsk têk birin, di heman demê de grûpa leşkerî ya taybet a Rûsyayê Wagner got ku wê gund kontrol kir.
Fermandariya Giştî ya Hêzên Çekdar ên Ukraynayê di raporta xwe ya rojane ya sibehê de, behsa şerê roja Şemiyê kir û got: "Yekîneyên Hêzên Berevaniyê yên Ukraynayê êrişên dagirkeran li deverên ... Blahodatne ... li herêma Donetsk pûç kirin."
Herwiha hat gotin ku hêzên wê êrişên Rûsî li 13 deverên din yên niştecîbûnê li herêma Donetsk şikandin.
Grûpa Wagner, ku ji hêla Amerîka ve wekî rêxistinek sûcdar a seranserî welatan hatî destnîşankirin, roja Şemiyê li ser Telegramê got ku yekîneyên wê Blahodatne kontrol kiriye.
Ajansa Reutersê ku ev nûçe belav kir nekarî bi awayekî serbixwe raportan piştrast bike.
Li gel germbûna şer li herêma Donetsk, xeta rast a eniya şer ne diyar e, nemaze li derdora bajarokê Baxmût ku hin ji wan pevçûnên herî giran ên şer di hefteyên dawî de diqewimin. Grûpa Wagner berê îddîayên serkeftinê yên pêşwext kirine.
Ukrayna got ku êrîşa Rûsyayê ya li ser Baxmût bi dawî nebûye, lê rewşa li eniya şer li wir her ku diçe dijwartir dibe. Serok Volodymyr Zelenskyy roja Înê got ku ew tund bû.
Pavlo Kyrylenko, parêzgarê herêma Donetsk li ser Telegramê got, di êrîşên Rûsyayê de li ser herêmê roja Şemîyê 4 sivîl hatin kuştin, yek li Baxmût, û 17 birîndar bûn.
Ukrayna soza tankên şer ên rojavayî bi dest xistiye û li balafirên şer digere da ku hêzên Rûsî û alîgirên Moskoyê paşve bixe, ku hêdî hêdî li beşekî eniya şer pêş ve diçin.
Roja Şemiyê, alîkarê payebilind ê Zelenskiy got ku danûstandinên bilez di navbera Ukrayna û hevalbendên wê de li ser daxwazên wê yên mûşekên dûravêj çêdibin da ku nehêlin Rûsya bajarên Ukraynayê wêran bike.
Çavkanî: Reuters