Serkirdeyên cîhanê vê hefteyê ji bo Kombûna Giştî ya Neteweyên Yekbûyî (NY) li New Yorkê dicivin û xwe ji bo axaftina Serokê Amerîka Donald Trump, bo sala duyemîn li pey hev, amade dikin, di demekê de ku gotûbêj li ser nakokîyên ku li Rojhilata Navîn û Ukraynayê berfireh dibin û herwiha metirsiyên girêdayî Hişberîya Çêkirî derdikevin pêş.
Nêzîkî 130 serkirdeyên welatan li hev dicivin, di demekê de ku sîstema piştî Şerê Cîhanê yê Duyemîn di bin zextê de ye û NY kar dike ku girîngîya xwe biparêze, di demekê de ku serok Trump beşdariya darayî ya Amerîkayê kêm kiriye û xwe ji dehan saziyên NY vekişandiye .
Serokê Çînê Xi Jinping, yê ku cara dawî di sala 2021’ê de bi rêya vîdyoyê li vê kombûna dîplomatîk axivîbû, dê neçe New Yorkê û li şûna wê roja Pêncşemê li Washingtonê hevdîtinên rû-bi-rû bi Trump re pêk bîne; ev yek jî nîqaşên derbarê rola NY di çareserkirina krîzên cîhanî de gur dike.
Li gel krîza moralî û darayî, pirsên derbarê serokê bê yê vê rêxistina 80 salî de jî derdikevin pêş: Sekreterê Giştî Antonio Guterres di dawiya sala 2026’an de dema xwe ya kar temam dike, lê hêj kesekî diyar ji bo cihgirtina wî tune ye.
Dîplomatan got ku dibe ku Encûmena Ewlekariyê ya NY (ku ji 15 endaman pêk tê) civînên asta bilind li ser mijarên Ukrayna, Hişberîya Çêkirî û Rojhilata Navîn pêk bîne, di nav de hevdîtinên bi serokên Ereb re.
Amerîka vê hefteyê bi dayîna 725 milyon dolar wekî beşdarîya di budceya asayî de, xwe ji destdana mafê dengdanê li civînê rizgar kir; lê dîsa jî zêdetirî milyarek dolar qerzdara rêxistinê ye û berdewam daxwaza kêmkirin û reforman dike.