Berdevkê Wezareta Derve ya Amerîkayê Tommy Pigott roja Înê got ku Amerîkayê dest bi "çalakîyên biryardar" kiriye da ku bazirganîya neqanûnî ya petrola Komara Îslamî ya Îranê têk bibe, ku wî got çavkanîyeke sereke ya dahatê ye ji bo rejîma Îranê da ku terorîzmê peredar û herêmê bêîstîqrar bike.
Li gorî daxuyanîyê, Wezareta Xezîneyê ya Amerîkayê parzûngehe mezin a serbixwe ya Çînî ligel nêzîkî 40 armancên din, di nav de jî keştî û xwedî an rêvebirên wan, ceza kirine.
Di daxuyanîyê de hat gotin ku ew kom roleke girîng di domandina hinardekirina petrolê de ji Îranê dilîze.
Berdevkê Wezaretê anî ziman ku ev çalakî çavkanîyên ku "çalakîyên bêîstîqrar ên rejîmê li Rojhilata Navîn peredar dikin" dike armanc.
Wî her wiha got ku helmeta "fişara herî zêde" ya rêveberîya Amerîkayê dê Komara Îslamî ji ber "êrîşa herêmî û gefên li ser berjewendiyên Amerîkayê" berpirsiyar bigire.
Wî got ku ev tedbîr pabendbûna Amerîkayê ya ji bo têkbirina şiyana Komara Îslamî ya peredarkirina terorîzmê, têkbirina şiyana wê ya piştgiriya wekîlan, û têkbirina şiyana wê ya gefxwarina li aramîya herêmî nîşan didin.
Pigott got ku hikûmeta Amerîkayê hîn jî balê dikişîne ser wê yekê ku "rejîma Îranê nikaribe dahatên neqanûnî yên petrolê ji bo pêşxistina ajendeya xwe ya xerab bikar bîne, di demekê de ku gelê Îranê ji rêveberîya aborî ya şaş û tepeserkirinê êşê dikişîne."