YE Daxwaza Lêpirsîneke Zelal ji Encamên Referandumê re Dike

Yekîtîya Ewrupa careke din bang li Tirkîyê dike ku li ser encamên referanduma ku desthilateke berfireh dide Serokomar Recep Tayyîp Erdogan, lêpirsîneke zelal bike.

Berdevkekî Serokê Komîsyona Ewrupî Jean-Claude Juncker li Brukselê got ku çavdêrên bêalî îdiayên bêrêkî û kiryarên neqanûnî tînin pêş û divê ew ji alîyê hikûmetê ve bi baldarî bêne lêpirsîn.

“Jiber raporta çavdêran, nêzîkbûna encamên ragihandî û bandorên berfireh yên guherîna xalîn qanûna bingehîn, em bang li karbidestên Tirk dikin ku gavên pêştir bi baldarî bavêjin û konsensusa netewî pêk bînin.”

Juncker bang li hemî alîyan kir ku bi berpirsane gavan bavêjin û ji hikûmetê xwest ku bo bêrêkîyên ku çavdêran dîyar kir, lêpirsîneke şefaf veke.

Berdevk da zanîn ku ne Juncker, ne jî serokê Konseya Ewrupî Donald Tusk jibo referandumê ligel Erdogan peyîvîne.