Doza Dadmendiyê jibo Vecdîn Avcilê li1994'an Hatibû Kuştin
Families of Kurdish victims
Welatiyên Kurd yên ku li salên 1990’an xizmên wan ji aliyê hêzên dewleta Tirkiyê ve hatine revandin û kuştin, ev bêhtirî 20 salan e li edaletê digerin.
Li gelek bajarên Tirkîyê û Kurdan xizmên winda û qurbaniyan, hem daxwaza dîtina hestiyên windayan dikin hem jî doza adaletê li karbidestan dikin.
Vecdîn Avcil’ê bavê 5 zarokan, yek ji qurbaniyên wan salan e. Ew li Dêrika bajarê Mêrdînê gundê Çildizê 12’ê Hezîran a 1994’an ji aliyê yekîneyeke leşkerên Tirkiyê ve hatibû binçav kirin û piştre aqûbeta wî nediyar mabû.
Doza dadgehê ya li ser berpirsê revandin û kuştina Vecdin Avcil, serbazê leşkerî Musa Çitil, demek berê bêyî ti cezayekî bistîne hate rakirin.
Malbata Vecdîn Avcil ji biryara dadgehê nerazî ye û daxwaza edaletê dike ku endamên malbatê beşdarî çalakî û daxuyanîyan dibin, da ku dengê xwe bilind bikin.
Behçet Avcilê ku birayê Vecdin Avcil e ji Dengê Amerîka re behsa revandina birayê xwe dike û doza dadê dike.
Behçet Avcil dide zanîn, her ku 13 dosyayên tawanê li ser fermandar Musa Çitil hebûn jî dadgehê ew dosyay betal kirine û ew wekî qehreman nîşan daye.
Hêjayî gotinê ye, malbata Vecdin Avcil xwe amade dike ku serî li Dadgeha Mafê Mirovan ya Ewropayê (DMME) bide û têkoşîna jibo pêkanîna edalatê bidomîne.
