Wezîrê Cengê yê Amerîkayê Pete Hegseth îro Sêşemê got ku operasyona Amerîkayê ji bo parastina keştîyên bazirganî ji Îranê li Tengava Hormuzê demkî ye û Washington naxwaze ji bo vê yekê ligel Îranê şer bike.
Hegseth di konferanseke rojnamevanî de li Pentagonê got: "Projeya Azadîyê di xwezaya xwe de berevanî ye. Ew operasyoneke demkî ye ku yek erkekî wê heye: parastina keştîvanîya bazirganî ya bêsûc ji dijminkarîya Îranî. Dê pêdivî nebe ku hêzên Amerîkî derbasî av û esmanê herêmî yên Îranê bibin. Ne pêwîst e. Em li şerekî nagerin."
Serokê Amerîkayê Donald Trump operasyona bi navê Projeya Azadîyê roja Duşemê ragihand, di demekê de ku Amerîka dixwaze Tengava Hormuzê ya stratejîk ji bin kontrola Îranê derxîne.
Agirbesta di navbera Amerîka û Îranê de îro Sêşemê ket jêr givaştinê piştî ku herdu alîyan li Kendavê teqe li hevdu kirin, bi mebesta kontrolkirina Tengava Hormuzê.
Ji destpêka operasyonên Amerîka û Îsraîlê li dijî rejîma Îranê ji 28'ê Sibatê ve, tevgera deryayî bi awayekî li tengavê hatiye astengkirin, di demekê de ku Îran hewl dide kontrolkirina Tengava Hormuzê wekî karteke fişarê ser Amerîkayê bikar bîne.