Hêzên Pasdarên Îranê îro Şemîyê piştrast kir ku du endamên hêza Besîc ji alîyê komeke “êrîşkaran” ve hatine armanc girtin û kuştin, piştî raportan behsa teqekirinê di roja cenazeya rêberê olî yê Îranê Elî Xameneyî de li Meşhedê kiribû.
Daxuyanîya Pasdaran dem û roja bûyerê diyar nekirin, lê roja Pêncşemê, ku hevdemî merasîma cenazeya Xameneyî li Meşhedê bû, raport hebûn ku teqe li hin hêzên leşkerî hatine kirin.
Li gor daxuyanîyê, du endamên Hêzên Besîcê, Seîd Sacjad Elewî û Mehdî Hunermend, li dema ku li Meydana Serfirazan a bajarê Meşhedê digerîyan, bûne armanc.
Ev ragihandin di demekê de hat piştî ku cîgirê karê ewlehî û karûbarên polîsan yê parêzgeha Xorasanê mirina her du kesan li devera Serferazan a bajarê Meşhedê piştrast kir, lê got ku bûyer “pevçûneke çekdarî” ji ber “sedemên kesî" bû.
Ajansa nûçeyan a dadwerîya Îranê “Mîzanê” ragihand ku li gor lêpirsînên destpêkê, di destpêkê de du sivîlan pev çûn û yek ji wan hat kuştin. Piştre, bi destwerdana kesekî sêyemîn, kesê duyemîn jî mir.
Niha, du îdiayên cûda yên çawanîya bûyerê hatine pêşkêşkirin: Çavkanîyek hikûmetê di destpêkê de ragihand ku pevçûn ji ber sedemên kesî çêbûye, lê Pasdaran paşê got ku du endamên Hêzên Besîcê di dema nobedarîyê de ji hêla “êrîşkaran” ve hatine armanckirin.