Elî Zeydî, serokwezîrê Îraqê yê destnîşankirî, îro Şemîyê gihîşt Herêma Kurdistanê û ji alîyê karbidestên Hikûmeta Herêma Kurdistanê ve hate pêşwazîkirin.
Ji bilî hevdîtina bi Serokwezîrê Herêma Kurdistanê Mesrûr Barzanî re, Zeydî herwiha bi Serokê berê yê Herêma Kurdistanê Mesûd Barzanî re civîya.
Baregeha Barzanî di daxuyanîyekê de got: "Di kombûnê de behsa pêwîstîya bilezkirina pêkanîna hikûmetê hate kirin ku li gor encamên hilbijartinê ye."
Daxuyanîyê herwiha got: "Serokwezîrê erkdarkirî tekez kir ku pêwîst e pirsgirêkên neyînî yên berê werin derbaskirin û di têkilîyên di navbera hikûmeta federal û Hikûmeta Herêma Kurdistanê de rûpeleke nû were vekirin. Hemdem, (serokwezîr) ligel şanda ligel bang li fraksyona hikûmî û parlemanî ya Partîya Demokrata Kurdistanê kir ku bi beşdarîyeke çalak di prosesa siyasî û pêkanîna hikûmeta federal de vegere Bexdayê."
Fraksyona PDK'ê meha Nîsanê li parlemana Îraqê ragihand ku ewê ji ber "binpêkirinên destûrî û yasayî" yên di hundirê parlemanê de rûniştinên parlemanî boykot bike.
Zeydî ji alîyê hevpeymanîya Çarçoveya Hemahengî ya Şî'a roja Duşemê hate destnîşan kirin da ku kabîneya nû ya Îraqê damezrîne.
Serokê Amerîkayê Donald Trump do Înê ji rojnamevanan re got ku ew piştgirîya Zeydî dike.