Senator Lindsey Graham, ku yek ji senatorên herî navdar ên Komarî û dostê gelê Kurd bû, di temenê xwe yê 71 salî de koça dawî kir.
Nivîsgeha Senator Graham roja Yekşemê sibehê got, "Senator Lindsey Graham piştî nexweşîyeke kurtdem û ji nişka ve, şeva Şemîyê koça dawî kir. Malbata Senator Graham spasîya hemû kesên ku ji bo wî dua dikin, dike û ji we dixwaze ku hûn di vê dema dijwar de rêz li nepeniya wî bigirin."
Serok Trump li ser Truth Social nivîsand: "Senator Lindsey Graham, yek ji mezintirîn kesayetî û senatorên ku min nas kiriye, koça dawî kir! Wî her tim bi zehmetî xebitî, û ew welatparêzekî rastîn ê Amerîkî bû. Koça dawî ya Lindsey windahîyeke mezin e! Hûrgulî û merasîma cenazeyê wî dê paşê werin ragihandin. Çi nûçeyek xemgîn e!”
Serokê Herêma Kurdistanê Nêçîrvan Barzanî peyamek sersaxîyê ji malbata Senator Lindsey Graham re şand.
Wî li ser platforma X’ê got, "Ez ji ber koça dawî ya Senator Lindsey Graham, dostekî hêja yê gelê Kurd, pir xemgîn im. Parêzvanî û piştgîrîya wî ya bêdawî li Kurdistanê dê her tim bi bilindî were nirxandin. Ez sersaxîyê ji malbat û hevkarên wî re dixwazim.”
Serokwezîrê Hikûmeta Herêma Kurdistanê Mesrûr Barzani jî sersaxî ji malbata Senator Lindsey Graham re xwest.
"Bi xemgînîyeke mezin min nûçeya koça dawî ya Senator Lindsey Graham bihîst. Ez sersaxîyê ji malbat, heval, rêveberîya Senatoyê û endamên Senatoyê re dixwazim. Gelê Kurd dê ti carî dostanî û piştgirîya berdewam a Graham ji bîr neke," Barzanî li ser platforma X’ê got.
Fermandarê Hêzên Sûrîya Demokratîk Mezlûm Ebdî jî sersaxîya malbata Graham kir û di postekê de li ser platforma X'ê got, "Bi bihîstina agahîya koça dawî ya Senator Lindsey Graham, ez pir xemgîn im. Xizmeta wî ya berfireh, serokatîya wî ya bi prensîb, piştgirîya wî ya bêwestan ji bo Kurdan û parêzvanîya wî ya bêdawî ji bo Sûriyeyeke aştîyane û dadperwer dê di dîrokê de werin nivîsandin. Di vê dema xemgînîyê de, ez sersaxîyên xwe yên ji dil ji malbat, heval û hezkirîyên wî re dixwazim. Bila ew di aştîya hetahetayî de razê."