Di nav berdewamîya şermezarkirina êrîşa ku roja Şemîyê ji alîyê Hûsîyên Yemenê ve li ser paytexta Siûdîyê, Riyad, hatibû kirin de, îro Yekşemê careke din Balafirgeha Navneteweyî ya Riyadê bû armanc.
Hevpeymanîya leşkerî ya bi serokatîya Siûdiyê li Yemenê ragihand ku Balafirgeha Navneteweyî ya Riyadê careke din rastî êrîşan hat.
Paş vê êrîşê Desteya Firînê ya Sivîl a Siûdîyê ragihand ku Balafirgeha Navneteweyî ya Şah Fehid li bajarê Damamê êvara Yekşemê bû armanca êrîşekê. Desteyê li ser X'ê got ku karê nirxandina ziraran û piştrastkirina ewlehîya hemû bingehên balafirgehê hîn jî berdewam e.
Doh êrîşeke mûşekî li ser heman balafirgehê hate kirin. Hûsîyan çend demjimêran şûn ve bi awayekî nerasterast berpirsiyarîya êrîşê li ser xwe girt. Li gorî raportan, di encama êrîşê de herî kêm 12 kes hatin kuştin û zêdetirî 300 kesan birîndar bûn.
Siûdî, Misir, Pakistan û Tirkîyê di daxuyanîyeke hevbeş de ragihandin ku êrîşên Hûsîyan li ser Siûdîyê binpêkirineke eşkere ya yasayên navneteweyî ne. Wan her çar welatan bi taybetî amaje bi êrîşên li ser Balafirgeha Şah Xalid a Riyadê kir û daxwaz kir ku ev êrîş bê şert û merc werin rawestandin.
Herwiha, serokê Amerîkayê êrîş “tersnak” binav kir û got ku ewê bi Mîrê cîgir ê Erebistana Siûdî Mihemed bin Selman re gotûbêjan bike û beşdarîkirina şerê dijî Hûsîyan binirxîne.