Fermandarîya Navendî ya Amerîkayê (CENTCOM) îro Şemîyê ragihand ku di roja 22'an de ji operasyonên dijî rejîma Îranê de hêzên Amerîkayê li bêtirî 8,000 armancên leşkerî yên Îranê dane.
Brad Cooper, fermandarê CENTCOM'ê, di peyameke vîdyoyî de got ku di nav wan 8,000 armancan de, 130 keştîyên Îranî hatine armanckirin. Wî da zanîn ku "ji Cenga Cîhanê ya Duwem ve, ev tunekirina herî min ya hêzeke deryayî di nav sê hefteyan de ye."
Cooper got ku Operasyona Hêrsa Dastanî plana xwe ya tunekirina şiyana Îranê ya nîşandana hêzê ji derveyî sînorê wê berdewam dike.
Karbidestê leşkerî yê Amerîkayî diyar kir ku "Îran bi awayekî berçav şiyana şer di sê hefteyên dawî de ji dest daye. Em bi hezaran mûşekên Îranî, dronên pêşketî, û hemû hêza deryayî ji holê radikin."
Cooper bal kişand ser êrîşeke berfireh a Amerîkayê dijî bingeheke jêrzemînî ku li ser berava Îranê dikeve.
"Rejîma Îranê ew navenda jêrzemînî ji bo hilanîna mûşekên krûz ên dijî keştîyan, mûşekavêjên gerok û kelûpelên din bikar dianî û bi rîya wan metirsî li geştên deryayî (li Tengava Hormuzê) dikir," wî got.
Operasyonên Amerîka û Îsraîlê dijî rejîma Îranê di 28'ê Sibatê de destpê kirine. Serokê Amerîkayê Donald Trump roja Înê li ser platforma Truth Social got ku Amerîka nêzîkî pêkanîna armancên xwe li Îranê dibe.