<p>Bi dijwarbûna êrîşên DAIŞ’ê yên ser Kobanê ku şervanên Kurd bi şerekî giran li dijî terorîstan berevaniyê dikin, li bajarên Kurdan û seranserê Tirkîyê ji roja Duşemê ve çalakiyên piştevanîyê yên girseyî didomin.</p> <p>Partiya Herêmên Demokratîk (DBP) jî li bajarên Kurdan banga serhildanê kir û daxwaz ji gel kir, li her cihî piştgirîyeke xûrt ji berxwedana Kobanê re nîşan bide.</p> <p>Navenda Giştî ya HDP’ê îro Sêşemê jî bi daxuyanîyekê din ragihand, heta piştgirîya DAIŞ’ê ya ji ser sînorên Tirkîyê neyê qutkirin, rêyek ji her cure alîkariyên jibo Kobanê re venebe û statuya rêvebirîyên kantonan neyên naskirin, wê ev çalakî bênavber berdewam bikin.</p> <p>Bi van bangan re bi taybet li bajarên Kurdan yên mîna; Amed, Batman û li Tirkîyê jî bajarên Stenbol, Enqere û gelek deverên din heta derengiya şevê protestoyan berdewam kir.</p> <p>Li dema van çalakiyan car bi car di navbera xwepêşander û polîsan de pevçûn derketin û ligel hin agahiyên birîndaran, ziyanên madî jî çêbûn.</p> <p>Li Stenbolê şevê din li Taksîm, Kadikoy, Bagcilar, Esenler, Avcilar û hin cihên din meş hatin lidarxistin, li derengiya şevê hin rêyên mezin yên bajêr ji trafîkê re hatin girtin.</p> <p>Rêvebirê DBP’ê yê Stenbolê Farûk Kaya li ser çalakiyên berdewam ji Dengê Amerîka re da xuya kirin, ew ji civaka navnetewî û hikûmeta AKP’ê dixwazin jibo beralîkirina êrîşên DAIŞ’ê yên ser Kobanê rê li ber alîkariyên berevanî û mirovî vekin.</p> <p>Hêjayî gotinê ye, çalakiyên piştevanîya Kobanê bi taybet li bajarên Kurdan û metropolên Tirkîyê ji şevê din ve didomin ku li gor daxuyanîyên dawî tê çaverêkirin protesto û xwepêşandan bi awayekî xûrtir berdewam bikin.</p> <div class="tag_image tag_audio_plain aa" contenteditable="false" mode="audio|plain|2475288">Çalakiyên Piştevaniya Kobanê Didomin<img alt="" src="../../../img/spacer.gif" title="This is just placeholder, it will be replaced on public site." /></div> <p> </p>