Rawêjkarê Ewlekariya Niştimanî ya Amerîka John Bolton îro Yekşemê got vekişîna hêzên Amerîkî ji Sûriyê mercdare bi têkbirina bermayên Daişê û piştrastkirina ku wê Tirkiyê êrîşî Kurdên Sûriyê neke.
Bolton, ku bo serdanekê li Îsraîlê ye, got tu dem nehatiye destnîşankirin ji bo vekişîna hêzên Amerîka ji Sûriyê.
Bolton ê ku roja Duşemê serdana Tirkiyê dike, got Amerîka rijd e ku divê hevalbendên wê yên Kurd ji êrîşa pilankirî ya Tirkiyê parastî bin.
Bolton got:
“Em bawer nakin ku wê Tirkiyê kiryareke leşkerî bike bê hevrêzî û erêkirina Amerîka.”
Bolton got Amerîka ji hevalbendên xwe yên Kurd dixwaze ku xwe ragirin û daxwaza parastinê ji Rûsya an hikûmeta serokê Sûriuyê Beşar Esed nekin.
Wî got:
“Ez bawrim ew (Kurd) dizanin dostên wan kîne .”
Bolton her wiha got şandiyê taybet ê Amerîka ji bo şerê dijî Daişê Jim Jeffrey, wê vê hefteyê serdana Sûriyê bike da Kurdan piştrast bike ku Amerîka dest ji wan bernedaye.