Li Kabulê Dema Nimêja Cejnê Êrîşên Roketî Çêbûne

Ajansa nûçeyan ya Reutersê ragihand ku li nêzî qesra seroktîyê ya Kabul ya paytexta Afganistanê roket ketine.

Roket di dema nimêja cejnê de ketin û hîn nayê zanîn ku ew êrîş ji alîyê kê ve li dar ketine.

Wezîrê Navxweyî Mirwais Stanekzai piştrast kir ku sê roket li derveyî qesra seroktîyê ketine û da zanîn ku ti kes birîndar nebûye.

Dema Serokomarê Afganistanê Eşref Ganî û karbidestên pê re li ser nimêjê bû hîn peqîn hatin bihîstin, lê wan nimêja xwe domand.

Ganî piştre daxuyanîyeke ku ji televîzyonan hat belav kirin weşand.

Amerîka û NATO hêzên xwe ji Afganistanê vekişandin û bi vekişîna wan re pevçûnên di navbera hêzên Afgan û Talîbanê de zêdetir bûn.

Di pevçûnan de çekdarên Talîbanê hin xalên girîng yên sînor û hin herêmên din yên mezin bi dest xistin.

Di salên borî de Talîbanê di cejnê de bi awayekî fermî agirbest radigihand.

Berî cejnê 15 mîsyonên dîplomatîk yên Afganistanê û nûnertîya NATO ji Talîbanê xwestibûn ku êrîşên xwe rawestînin.

Talîban û hikûmeta Afgan berî wê bangê li Doha ya Qatarê danûstandin kiribûn, lê bo aştîyê li hev nekiribûn.