Wezîrê Saxlemî yê Lubnanê Firas Abîad îro Çarşemê di peyameke televîzyonî de got ku êrîşên Îsraîlê yên ser Lubnanê yên ji 7ê Cotmeha 2023an vir ve 4,047 kes kuştine û 16,638 kes jî birîndar kirine.
Abîad da zanîn ku di êrîşan de 316 zarok û 790 jin hatine kuştin.
Abîad got ku Lubnanê 67 êrîşên Îsraîlî li ser nexweşxaneyan tomar kirine ku 40 nexweşxane rasterast bûne armanc û 7 nexweşxane jî ji neçarî hatine daxistin.
Şerê navbera Îsraîl û Hizbullaha Lubnanî piştî êrîşa Hamasê ya djî Îsraîlê ya 7ê Cotmeha 2023an de destpê kir û şer di meha Îlonê de gurtir bû piştî ku Îsraîlê êrîşên ser Hizbullaha hevbenda Îranê zêde kiribûn.
Îsraîlê rêberê Hizbullahê Seyîd Hesen Nasrallah kuştibû û êrîşên giran li paytext Beyrut û seranserî Lubnanê pêk anîbûn.
Karbidestên Îsraîlî di dawîya meha borî de gotibû ku êrîşên Hizbullahê 45 sivîl li bakurê Îsraîlê û Girên Golanê yên bin kontrola Îsraîlê de kuştine.
Artêşa Îsraîlî jî ragihandibû ku herî kêm 73 leşkerên Îsraîlî li bakurê Îsraîlê, Girên Golanê û di şerên li başûrê Lubnanê de hatine kuştin.
Hêjayî bîrxistinê ye ku Amerîka û Fransa di 27ê Mijdarê de agirbestek di navbera Îsraîl û Hizbullahê de pêk anîbû ku dawî li şer bînin, lê her du alî hevdu bi binpêkirina agirbestê tawanbar dikin.
Lubnan dibêje Îsraîl sivîlan dike armanc, lê ÎSraîl dibêje ew çekdar û binesazîya Hizbullahê dike armanc.
Jêder: Reuters