Karbidestekî payebilind ê ewlehîyê yê Libnanî ji ajansa Reuters re got ku leşkerên artêşa Libnanî îro Sêşemê li bajarokê Zewter el-Xerbîye yê başûrê Libnanê belav bûn, piştî ku hêzên Îsraîlê ji herêmê vekişîyan, li gor planeke bi navbeynkarîya Amerîkayê.
Li gor planê, pêwîst e leşkerên artêşa Libnanê li hin deverên başûrê welêt dest deyînin ser çekên koma Hizbullah a ku bi Îranê ve girêdayî ye û leşkerên Îsraîlê gav bi gav vekişin
Artêşa Îsraîlê roja Duşemê got ku plan, ku wek Programa Navçeya Taqîkirinê hatiye binavkirin, dest pê kiriye.
Artêşê piştrast kir ku ew hêzên xwe wekî beşek ji Programa Navçeya Taqîkirinê ji nû ve bicih dike.
Radestkirina roja Sêşemê ceribandina yekem a planê ye, ku Libnan hêvî dike ew bikaribe kontrola xwe li ser xeteke erdê ya bi qasî 10 km kûr di nav welêt de bisepîne ku ji hêla leşkerên Îsraîlê ve hîn jî dagirkirî ye.
Bi dehan gund li wê herêmê hatine hilweşandin û binesazîya giştî hatiye wêrankirin, di nav de jî nexweşxane û navendên av û elektrîkê. Bi deh hezaran Libnanî yên ku vê herêmê wekî mala xwe dibînin, nikarin vegerin wir.
Gera dawî ya pevçûnên di navbera Hizbullah û Îsraîlê de di destpêka Adarê de, du rojan piştî êrîşên Amerîka û Îsraîlê li dijî Îranê, dest pê kir. Hizbullahê got ku kiryarên wê piştgirîya Tehranê dikin.
Artêşa Libnanê bangeke nû li niştecihên bajarokê Zewter el-Xerbîye kir ku derbasî wê nebin heta ku rewşa ewlehîyê aram dibe û ji bo ewlehîya xwe rênimayên yekîneyên leşkerî yên bicihbûyî bişopînin.
Ev pêşketin di demekê de tê ku Serokê Amerîkayê Donald Trump îro li Washingtonê pêşwazîyê Serokê Libnanê Joseph Aoun dike.