Neteweyên Yekbûyî (NY) ragihand ku li Îraq û Sûrîyê bi qasî 30,000 çekdarên Dewleta Îslamî (DAIŞ) hene.
Lêkolîna NY’ê ya darbarê DAIŞ’ê raber dike ku li Afganistan, Yemen û Lîbya jî çekdarên wê rêxistinê hene.
Li gor rapora ku do Duşemê hat weşandin, li Lîbya bi qasî 3000-4000 çekdarên DAIŞ’ê dijîn.
Rapor dide zanîn ku DAIŞ’ê fermandarên xwe yên payabilind şandine Afganistanê û li wî welatî jî hejmara çekdarên rêxistinê digêhîje 4500 kes.
DAIŞ li Sûrîye û Îraqê bi hêz bûbû, lê li Asya Başûrê Rojhilat û Afrîqa Rojava jî gelek alîgirên wê hene.
Pispor dîyar dikin ku li Yemenê bi 7000 çekdar El-Qayde çalak e, lê li wî welatî bi sedan çekdarên DAIŞ’ê jî hene.
DAIŞ, bi rêberîya Ebubekir El Bexdadî di sala 2014’an de mezin bûbû.
DAIŞ’ê li Sûrîyê Reqa û li Îraqê jî Mûsil bi dest xwe xistibû û xîlafet ragihandibû.
Koalîsyona Navneteweyî ya Dijî DAIŞ’ê, ku Amerîka pêşengîya wê dike, di Nîsanê de ragihandibû ku DAIŞ li Sûrîyê li ber qedandinê ye.