Berpirsê Karê Derve yê Kantona Cizîrê Abdulkerîm Omer îro Çarşemê ragihand ku wan 8 hemwelatîyên Amerîkî radestî hikûmeta Amerîka kirin, ku bi endamên DAIŞ’ê re hatibûn desteser kirin.
Omer da zanîn ku 6 ji kesên teslîmkirî zarok, 2 jî jin in, lê wî nasnameya wan kesna eşkere nekir.
“Ew ser daxwaza hikûmeta Amerîka û bê ku zorkirin hebe, bi dilxwestî vedigerin welatê xwe,” Omer got.
Îsal cara duyê ye ku hikûmeta Ameîrka hemwelatîyên xwe ji Sûrîyê tine malê. Di cara yekê de jineke Amerîkî û 4 zarok hatibûn vegerandin.
Karbidestên Kurdên Sûrîyê pir caran bang li civaka navnetewî dikin ku hemwelatîyên xwe ji destê wan bigirin jiber ku derfeta wan tune ku li wan kesan binêrin.