Çavdêrîya Sûrî ya jibo Mafên Mirovan (SOHR) îro Duşemê ragihand ku tevahîya dora Bendava Tişrînê ketiye destê Hêzên Sûrîya Demokratîk (HSD) û Meclîsa Leşkerî ya Minbicê.
SOHR’ê dîyar kir ku HSD û Meclîsa Leşkerî ya Minbicê nebûna dronên Tirkîyê wek fersendekê kar anîye û got ku komên Artêşa Netewî, ku bi piştgirîya Tirkîyê tevdigerin, ji herêmê vekişîne.
Li gor ragihandina SOHR’ê, piştî vekişînê, her du alîyan bi çekên giran, roket û topan êrîş birine ser hevdu.
Jêderên SOHR’ê dîyar dikin ku Meclîsa Leşkerî ya Minbicê li gir û gundên li dora Bendava Tîşrînê operasyon meşandine, li gelek enîyan pêşve çûye û piranîya enîyên Artêşa Neteweyî xistiye bin kontrola xwe.
HSD, ku Yekîneyên Parastina Gel (YPG) pêşengîya wê dike, di têkoşîna dijî Dewleta Îslamî (DAIŞ) de hevbenda serekî ya Amerîka ye û Washington hevkarîya bi HSD’ê re seba şerê dijî DAIŞ’ê girîng dibîne.
Washington dibêje ku operasyonên Tirkîyê yên li bakurê Sûrîyê metirsîyê çêdikin, lê Enqere banga pûçkirina HSD’ê dike û ji Washingtonê dixwaze ku piştgirîya xwe ya jibo şervanên Kurd vekişîne.
Amerîka di rojên borî de ragihand ku li Sûrîyê 2000 leşkerên wê hene û dîyar kir ku ewê piştgirîya xwe ya jibo HSD’ê bidomîne.
Jêder: SOHR, Reuters