Şêwirmendê Ewlekariya Neteweyî ya Koşka Spî Jake Sullivan roja Yekşemê got, Amerîka plan dike ku êrîşên din pêk bîne, piştî kuştina sê leşkerên Amerîkî dawiya hefteya borî ji hêla milîsên ku Îran piştgirîya wan dike ve.
Wî ji bernameya "Meet the Press" ya NBC re got, "em dê êrîşên zêde û çalakîyên din pêk bînin, da ku peyameke zelal bişînin ku Amerîka dê bersivê bide dema ku hêzên me tên êrîşkirin, dema ku welatiyên me bên kuştin".
Amerîka û Brîtanya roja Şemîyê dest bi êrîşan kir dijî 36 armancên Hûsî li Yemenê, di duyemîn roja operasyonên mezin ên Amerîkî de li dijî komên girêdayî Îranê.
Êrîşên Şemiyê 13 cihên Yemenê kirin armanc ku Hûsiyan ji bo êrîşkirina keştiyên Deryaya Sor bikar anîne, Pentagonê got, rojekê piştî ku Amerîka pêla yekem ji êrîşên tolhildanê pêk anî li ser zêdetirî 85 armancên li Îraq û Sûriyê yên girêdayî Feyleqa Quds a Pasdarên Şoreşa Îslamî ya Îranê û milîsên ku ew piştgirîya wan dike.
Ew lêdanên herî dawî ne di pevçûnekê de ku li Rojhilata Navîn belav bûye ji 7ê Cotmehê ve, dema ku grûpa milîtanên Filistînî Hamasê ji Kerta Gazayê êrîşî Îsraîlê kir, û şerek gur kir ku komên çekdar ên alîgirên Tehranê kişandin nav.
Sullivan got, "tiştê ku roja Înê qewimî destpêk bû, ne dawiya bersiva me bû, û dê gavên din jî hebin, hin belkî nedîtî bin…Ez wê wekî hin helmetên leşkerî yên vekirî bi nav nakim."
Çavkanî: Reuters
