Fermandarê payebilind ê leşkerî yê Amerîkî ji bo Amerîkaya Latînî, general Francis Donovan, berpirsê payebilind ê Pentagonê Joseph Humire, û berpirsa karûbarên Venezuelayê, Balyoz Laura Dogu roja Çarşemê ji bo hevdîtinên ewlehîyê bi rayedarên demkî yên Karacas re serdana Venezuelayê kirin.
Di dema civînê de, rêberan pabendbûna Amerîkî ji bo Venezuelayeke azad, ewle û geş ji bo gelê wê û Amerîka û Parzmîna Rojava dubare kir.
Ev yekem serdana şandeya leşkerî ya Amerîkî ye bo Venezuelayê ji dema ku serokê ji kar dûrxistî Nicolas Maduro û jina wî meha borî ji hêla hêzên Amerîkî ve hatin girtin.
Daxuyanîyeke civîna fermandarê SOUTHCOM Donovan got, "Guftûgo li ser hawîrdora ewlehîyê, gavên ji bo misogerkirina pêkanîna plana sêqonaxî ya serok Donald Trump, bi taybetî aramîya Venezuelayê, û girîngîya ewlehîya hevpar li seranserî Parzmîna Rojava hatin kirin."
Hikûmeta Venezuelayê got ku şandeya Amerîkî bi serokê demkî Delcy Rodriguez, wezîrê berevanîyê Vladimir Padrino û wezîrê karên navxweyî Diosdado Cabello re civîya.
Herdu alî li hev kirin ku bi hev re ji bo şerê li dijî bazirganîya narkotîkê, terorîzm û koçberîyê bixebitin.
Hem Padrino û hem jî Cabello bi rastî sûcdarîyên têkildarî bazirganîya narkotîkê li Amerîkayê dibin.
Serdana artêşa Amerîkî piştî serdana wezîrê Enerjiyê yê Amerîkî Chris Wright a hefteya borî bo Karakas tê.
Herdu serdan armanca serok Trump a bikaranîna siyaseta leşkerî û enerjîyê ji bo handana Venezuelayê ji bo çaksazîyên mezin, destnîşan dikin.
Rêveberîya Trump gotiye ku ew ê karsazîya petrolê ya Venezuelayê di pêşeroja nêzîk de birêve bibe, di demekê de ku ew hebûnek deryayî ya bihêz diparêze li herêma Karîbîyan a ku artêşa Amerîkî li wir keştîyên gumanbar ên narkotîkê dike armanc û bi nobedarên peravê re kar dike da ku tankerên petrolê yên bi Venezuelayê ve girêdayî bigire.