Wezareta Saxlemîyê ya Tirkîyê her roj daneyên pandemîya COVID-19 bi raya giştî ra parve dike.
Li Tirkîyê daneyên dawî nîşan didin, ku rêjeya hejmara pêketî û mirinan di demên dawî de zêdetir bûne.
Sedemên vê yeke gelo çi ne? Bi hatina Payîzê û tekilîya zêdebûna hejmara COVID-19 çî ye? û bi taybetî jî rewşa zêdebûna pêketîyên vîrusa korona ya li Îstenbul’ê çi ne?
Seroka Odeya Doktoran ya Îstenbul'ê Prof. Dr. Pinar Saîp dîyar dike ku li Tirkîyê gelek sedemên belavbûna vîrusa korona hene.
"Zêdetir ji pêşigirtina belavbûna COVID-19 aborî berbiçav hat girtin. Sistkirina tedbîran ya bi lez û bez û bêplan, dîsa serbest hiştina çûnûhatin di navbera bajaran de û geştîyarî jî yek ji wan sedemane ku rêjeya hejmara pêketîyên vîrusa korona zêdetir bûn."
Saîp bi hatina Payîzê û tekilîya zêdebûna hejmara COVID-19 wiha şîrove dike "Bi hatina Payîzê dibe ku hejmara pêketîyên vîrusa korona zêdetir bibin. Jiber ku mirov wê zêdetir li cîh û qadên girtî de bimînin. Divê tedbîr dijî vê yekê jî werin standin."
Saîp di domandina axaftina xwe de balkişand ser rewşa Îstenbul'ê û got jiber nifusa zêde ya vî bajarî hejmara pêketîyan zêde ne û divê tedbîrên taybet jibo vî bajarî werin standin.
"Stenbul jiber ku bajarê herî mezin yê Tirkîyê ye û jiber ku karker herî zêde li vî bajarî di nav hev de û bi awayeke komî dixebitin rîska belavbûna vîrûsa korona zêdeye. Divê jibo Îstenbul'ê hemî sazîyên tendirustîyê bi hev re û bi awayeke hevkarî bixebitin."
