Karbidestên Ukrayna got ku mûşekeke Rûsî roja Şemiyê li navçeyek niştecihbûnê ya bajarokekî li başûrê Ukraynayê ku ne dûrî bingeha navokî ye, 12 sivîl birîndar kirin û tirsa ji qezayek navokî di dema şerê li Ukraynayê de zêde kir.
Vitaliy Kim, parêzgarê herêma Mykolaiv, li ser Telegramê got ku 4 zarok di nav wan birîndaran de hene, di êrîşa ku ziyan gihandiye çend malên taybet û avahiyeke 5 qatî li Voznesensk.
Bajar bi qasî 30 km dûrî bingeha navokî ya Pivdennoukrainsk (PNPP) ye, duyemîn mezintirîn li Ukraynayê.
Serdozgeriya giştî ya li herêma Mykolaiv, piştrast kir ku 12 sivîl birîndar bûne.
Kompaniya Energoatom, ku her çar jeneratorên enerjiya navokî yên Ukraynayê birêve dibe, êrîşa li ser Voznesensk wekî "kiryareke din a terorîzma navokî ya Rûsyayê" bi nav kir.
Roja şemiyê li herêma Mykolaiv gelek caran hişyariyên êrişên esmanî hatin bihîstin.
Energoatom di daxuyaniya xwe de got ku "Dibe ku ev mûşek bi taybetî li dijî bingeha navokî ya Pivdennoukrainsk ku artêşa Rûsyayê di destpêka meha Adarê de hewl da desteser bike, hatibe kirin."
Rûsyayê tavilê bersiva van tawanbariyan neda û ajansa Reutersê nekarî tavilê rewşa Voznesensk piştrast bike. Derbarê ziyanên kargeha Pivdennoukrainsk de ti agahî nehatine bidestxistin.
Desthilatdarên Ukraynayê bang li Neteweyên Yekbûyî û rêxistinên navneteweyî yên din kirin ku hêzên Rûsî neçar bikin ji bingeha Zaporizhzhia derkevin.
Bajarê Enerhodar, ku bingeha Zaporizhzhia ya herî mezin a Ewropayê lê ye, gelek caran rastî topbaranê hat û Mosko û Kyiv hevdu bi topbarakirina wê tawanbar dikin.
Çavkanî: Reuters
